純粹分享個人經驗,咁樣會大家易明啲,如果有咩講得唔好,或者講錯咗,希望可以糾正下我

(唔想用書面語,唔好怪我中英夾雜)

  1. 了解學生背景同程度

教外國人廣東話同教華人廣東話唔一樣,有中文底嘅人學廣東話會快好多。而教西方人同教日本人又唔一樣 ,因為佢哋嘅語言底子唔一樣,日本人已經學識好多漢字,所以佢哋靠估,都可以明白好多嘢,就好似香港人學日文一樣咁快。

要先了解學生背景同程度,要睇學習對象本身對中文有幾多認識 ,再去準備教材。

就算係外國人都好,佢哋屋企人可能日日對住佢哋講廣東話,但係佢哋唔識講,其實佢哋可能會學得好快 。

  1. 熟讀同準備好教材 

如果自己都唔知道嗰一篇文章係教緊乜嘢,上堂嗰一刻先備課就真係太遲。如果你唔知要教乜嘢,學生會聽得出,都會學唔明。

喺呢一課要學啲乜嘢,你要知道本教材入面,嗰一課文章要教邊啲語法點,之後你要知道每一個生字,佢哋嘅組成結構,仲有佢哋嘅意思,最好有英文翻譯。咁有啲學生可能英文唔係咁好你就最好準備埋圖片。如果佢哋都仲唔明白嘅話,就用佢哋嘅母語或者用廣東話嚟解釋 。

  1. 點先知我教嘅嘢有冇用 ?

通常你覺得好容易嘅嘢,對於學生嚟講其實好難。

你要知道學生明唔明嘅話 ,你叫佢用英文或者佢母語翻譯一次就知道 。

或者可以同佢溝通下,叫佢主動話你知佢乜嘢唔明,或者你主動問佢:「你明唔明呢個意思?」

再被動啲嘅學生就可以直接全部解釋一次,唔使問佢明唔明,你解釋曬好清楚咁講完,佢應該都會明 。

  1. 想入行教廣東話有咩方法 ?

提升自己嘅中文底 → 增加自己嘅教學經驗 → 宣傳自己 → 做個盡責嘅老師 

其實香港係冇專門培訓廣東話老師嘅機構, 如果真係好想教廣東話, 就好睇你識唔識宣傳自己 。要接JOB嘅話,一定要靠自己,靠agency會食水好深。同埋佢哋由得你自己死,唔會培訓你啲乜嘢。如果入行,最好本身喺教育界有經驗 。

雖然我都明好多人一開始係冇經驗,如果冇嘅話最好去讀一讀教育文憑或者漢語嘅教學法文憑 ,呢啲我唔詳細講,有興趣可以自己google搵下。

如果想喺呢一行進修嘅話 ,可以讀漢語教學嘅碩士。有啲人本身係語言學底,或者翻譯出身, 對呢一行都有幫助 。但始終係教書,如果冇基本嘅教學概念,好多時候會好挫敗。所以教學經驗好緊要 ,因為你冇料到嘅話,啲學生好快都唔會跟你學 ,因為佢哋上堂聽極都唔明,而且你又唔明佢唔明你啲乜嘢 ,所以成件事會好挫敗,好快就會對學廣東話呢件事冇興趣 。如果你有學習外語嘅經驗,會對你好有幫助,因為你至少會知道好嘅老師應該會點教 ,差嘅老師會係教成點。

而我自己嘅經驗就係,有啲老師真係唔識教書, 覺得讀完本書就可以放工走人, 之後喺測驗之前就不停咁放試題出嚟畀大家做,其實佢好多嘢都解釋得唔好,同埋我好多嘢都唔明,不過因為佢不停咁樣迫我哋做試題,靠自己嘅能力最後都過到關。

希望大家唔會做咁樣嘅老師,而且廣東話係冇一個好正式嘅考試,畀外國人去考,而家淨係有一個叫做「粵音水平測試」嘅考試,大部分都係畀中文超級好嘅人去考,所以暫時考廣東話係冇分級考試嘅。冇分級考試嘅話,對學生嚟講就會冇咁大吸引力同動力去學。

唔想做臭自己個名的話,就最好做個好老師,因為你教得唔好自然就會好少學生。而我喺學生嘅口中都聽唔少教得好差嘅CASE 。佢哋都會同人講之前係喺邊度學,仲有邊個老師教過佢哋。